Avropanın cənubunda güclü isti hava dalğası müşahidə olunur. Sardiniya adasında havanın temperaturu kölgədə 47 dərəcəyə çatıb.
Bildirilir ki, son günlər isti hava dalğasının mərkəzi İspaniyadan İtaliyanın cənubuna doğru hərəkət edib. Sardiniyada qeydə alınan 47 dərəcə istilik adada 2023-cü ilin iyulunda qeydə alınmış 48,2 dərəcəlik rekorddan cəmi 1,2 dərəcə aşağıdır. Bu göstərici, həmçinin 2021-ci ildə Siciliyada qeydə alınan və Avropa üzrə rekord hesab edilən 48,8 dərəcəyə də yaxındır.
Mütəxəssislər gecə və səhər saatlarında da anomal isti hava şəraitinin davam edəcəyini bildirirlər. Bəzi ərazilərdə temperaturun 25 dərəcədən aşağı enməyəcəyi gözlənilir. Bununla belə, əvvəlki istilik zirvəsi ilə müqayisədə havanın təxminən 10 dərəcə sərinləşəcəyi proqnozlaşdırılır.
