Ermənistanın Baş naziri Nikol Paşinyan bildirib ki, Ermənistan-Türkiyə münasibətlərinin normallaşması prosesində yeni xüsusi nümayəndənin təyin edilməsi ilə bağlı qərar hələ qəbul olunmayıb.
Onun sözlərinə görə, hazırda Türkiyə ilə dialoqun hansı formatda və hansı məntiqlə davam etdirilməsi məsələsi müzakirə olunur.
“Xüsusi nümayəndə ilə bağlı qərar hələ qəbul edilməyib. Türkiyə ilə ünsiyyət formatında müvafiq qərarlar qəbul etmək üçün işi necə, hansı məntiqlə və hansı formatda davam etdirəcəyimizi müəyyənləşdirməliyik. Hazırda bu məsələ ilə bağlı müzakirələr aparılır”, – deyə Paşinyan bildirib.
Qeyd edək ki, Ermənistanın Türkiyə ilə münasibətlərin normallaşması üzrə sabiq xüsusi nümayəndəsi Ruben Rubinyan hakim “Vətəndaş Müqaviləsi” Partiyası tərəfindən 9-cu çağırış parlamentin spikeri vəzifəsinə namizəd irəli sürülüb.
