Tailandın cənubunda yaraqlılar mülki infrastruktura 30-dan çox hücum həyata keçirib. Hücumlar nəticəsində 2 qadın yaralanıb.
Hadisələr Narathivat, Pattani və Yala əyalətlərində baş verib.
Hücumçular kommunal xidmətlərə məxsus nəqliyyat vasitələrini yandırıb, mobil rabitə qüllələrinə zərər vurub, həmçinin inzibati binalara və mağazaya hücum ediblər.
Hadisələrdən biri zamanı partlayıcı qurğunun işə düşməsi nəticəsində iki qadın qəlpə yarası alıb.
Tailand Ordusunun Dördüncü Hərbi Dairəsinin komandanı, general-leytenant Norathip Phoynok hadisələrin araşdırılması və təhlükəsizlik tədbirlərinin gücləndirilməsi barədə göstəriş verib.
Hərbçilər və polis yüksək hazırlıq vəziyyətinə gətirilib. Yolların və mühüm obyektlərin patrul xidməti gücləndirilib.
Yerli sakinlərə evlərindən çıxmamaları, şübhəli şəxslər və əşyalar barədə aidiyyəti qurumlara məlumat vermələri tövsiyə olunub.
Qeyd edək ki, Tailandın əsasən müsəlman əhalinin yaşadığı cənub bölgələrində silahlı münaqişə onilliklərdir davam edir. Narathivat, Pattani və Yala əyalətlərində fəaliyyət göstərən yaraqlılar bu ərazilərin Tailanddan ayrılmasını və burada müstəqil sultanlıq yaradılmasını tələb edirlər.
Münaqişənin 2004-cü ildən etibarən kəskinləşməsi nəticəsində 7 mindən çox insan həlak olub, 13 mindən çox insan yaralanıb.
