Samux rayonunda qarayara ilə bağlı epidemioloji vəziyyət stabildir. Yeni yoluxma halları qeydə alınmır və xəstəliyin əhali arasında yayılması müşahidə olunmur.
Səhiyyə Nazirliyinin məlumatına görə, rayonun Alıuşağı kəndində qarayara hadisəsi qeydə alındıqdan dərhal sonra aidiyyəti qurumlar tərəfindən zəruri epidemioloji və profilaktik tədbirlər həyata keçirilib.
Epidemioloji araşdırmalar zamanı xəstəliklə təmasda olmuş şəxslər müəyyənləşdirilərək tibbi müşahidəyə götürülüb və laborator müayinələr aparılıb. Hadisənin baş verdiyi təsərrüfatda da epidemioloji və epizootoloji araşdırma keçirilib, laborator müayinə üçün müvafiq nümunələr götürülüb.
Müşahidə və laborator müayinələrin nəticələrinə əsasən, 15 avqustdan etibarən yeni yoluxma halı qeydə alınmayıb. Təmasda olmuş şəxslər arasında da yeni yoluxma müəyyən edilməyib.
Hazırda xəstəlik aşkarlanan şəxslər tibb müəssisəsində müvafiq müalicə alırlar. Xəstəliklə təmasda olmuş digər şəxslər üzrə isə zəruri tibbi müşahidə və tədbirlər həyata keçirilib.
Hadisə ilə əlaqədar xəstəliyin yayılmasının qarşısının alınması məqsədilə aidiyyəti qurumlarla birgə profilaktik və əks-epidemik tədbirlər davam etdirilir.
Səhiyyə Nazirliyi epidemioloji vəziyyətə nəzarəti davam etdirir.
Qeyd edək ki, qarayara əsasən xəstə və ya tələf olmuş heyvanlarla, həmçinin onların yoluxmuş toxumaları və məhsulları ilə təmas nəticəsində insanlara keçən zoonoz xəstəlikdir. Xəstəliyin insandan-insana ötürülməsi olduqca nadir hallarda baş verir.
