Şəmkir rayonunda 6 nəfərin ölümü, 7 nəfərin isə yaralanması ilə nəticələnən ağır yol-nəqliyyat hadisəsi baş verib.
Hadisə Bakı-Qazax magistral yolunun Şəmkir rayonundan keçən hissəsində qeydə alınıb.
İlkin məlumata görə, “VAZ 2106” və “KIA” markalı minik avtomobilləri toqquşub. Qəza nəticəsində 6 nəfər həlak olub. Ölənlərin Şəmkir rayonunun Mahmudlu kənd sakinləri olduğu bildirilir.
Hadisə zamanı xəsarət alan 7 nəfər — 4 kişi və 3 qadın — Şəmkir Rayon Mərkəzi Xəstəxanasının Təcili tibbi yardım şöbəsinə hospitalizasiya olunub.
TƏBİB-in yaydığı məlumata görə, xəsarət alan şəxslərdən 2-nin vəziyyəti ağır, 5-nin vəziyyəti isə orta ağır qiymətləndirilir.
“Hazırda hər birinə zəruri tibbi xidmətlər göstərilir”, – deyə TƏBİB-dən bildirilib.
Qeyd edək ki, ilkin məlumatlarda qəza nəticəsində 5 nəfərin hadisə yerində öldüyü bildirilmişdi. Son məlumatlara əsasən, ölənlərin sayı 6 nəfərə çatıb.
Faktla bağlı cinayət işi başlanılıb. Hadisənin səbəbləri araşdırılır.
