Baş Prokurorluqda Azərbaycanın konstitusiya quruluşunun zorla dəyişdirilməsinə, ərazi bütövlüyünün parçalanmasına, milli nifrət və düşmənçiliyin salınmasına, həmçinin terrorçuluğa açıq çağırışlarla bağlı başlanmış cinayət işi üzrə ibtidai istintaq davam etdirilir.
Xəbər Mərkəzi Baş Prokurorluğun Mətbuat xidmətinə istinadən xəbər verir ki, istintaq zamanı Rusiya Federasiyası vətəndaşları — “Moskva 24” telekanalının aparıcısı və jurnalist İvan Knyazev, Rusiyada siyasi məsləhətçi və media eksperti kimi fəaliyyət göstərən Semyon Uralov, televiziya jurnalisti və Rusiya Federasiyasının nəqliyyat nazirinin müşaviri Aleksey Çadayev barəsində əsaslı şübhələr müəyyən edilib.
Məlumata görə, həmin şəxslər 14 iyul 2026-cı ildə “YouTube” platformasında “Семён Уралов” kanalında yayımlanan “Чистота понимания” verilişində Azərbaycan Respublikasına qarşı zorakı üsulların tətbiq edilməsinə, konstitusiya quruluşunun zorla dəyişdirilməsinə və ərazi bütövlüyünün parçalanmasına yönələn, eləcə də milli nifrət və düşmənçiliyi təşviq edən çağırışlarla çıxış ediblər.
Bundan başqa, 13 avqustda yayımlanan verilişdə də Azərbaycan Respublikasına qarşı zorakı üsullardan istifadə edilməsi, o cümlədən ayrı-ayrı şəxslərin fiziki məhvetmə təhlükəsi altında saxlanılması və ünvanlı şəkildə sıradan çıxarılması barədə fikirlər səsləndirildiyi, bununla da terrorçuluğa açıq çağırışlar edildiyi bildirilib.
Faktla bağlı Baş prokuror tərəfindən Cinayət Məcəlləsinin 214-2 (terrorçuluğa açıq çağırışlar), 281.2 (dövlət əleyhinə yönələn açıq çağırışlar) və 283.2.1-ci (milli nifrət və düşmənçiliyin salınması) maddələri ilə cinayət işi başlanıb. İbtidai istintaqın aparılması Baş Prokurorluğun İstintaq idarəsinə həvalə olunub.
Toplanmış sübutlar əsasında Uralov, Knyazev və Çadayev təqsirləndirilən şəxs qismində cəlb ediliblər. Onlar Azərbaycan hüdudlarından kənarda olduqları üçün barələrində axtarış elan edilib və məhkəmənin qərarları ilə həbs qətimkan tədbiri seçilib.
Həmçinin təqsirləndirilən şəxslərin tərəfdaş dövlətlərin ərazisində müəyyən edilərək tutulması və Azərbaycana təqdim olunması məqsədilə aidiyyəti dövlət qurumlarına müraciətlər edilib. Onların “İnterpol” kanalları vasitəsilə beynəlxalq axtarışının təşkili istiqamətində də zəruri tədbirlər görülür.
Baş Prokurorluq bildirib ki, Azərbaycanın suverenliyinə, konstitusiya quruluşuna və ərazi bütövlüyünə qarşı yönəlmiş qanunsuz əməllərə qarşı hüquqi tədbirlər bundan sonra da davam etdiriləcək.
