Sükan arxasında dəfələrlə yuxuya getdiyini bilən sürücünün yenidən avtomobil idarə etməsi insanların həyatını təhlükəyə atan məsuliyyətsiz davranışdır.
Noyabrın 3-də saat 09:38 radələrində Xocasən–Lökbatan yolunun Binəqədi rayonu ərazisindən keçən 2-ci kilometrində Cavid Ağayevin idarə etdiyi “Toyota” markalı avtomobil körpəsini uşaq arabasında aparan piyada A. Abdullayevanı vurub.
Qəza nəticəsində qadın xəsarət alıb. Körpənin vəziyyətinin normal olduğu bildirilir.
Hadisədən sonra sürücü saxlanılıb və faktla bağlı cinayət işi başlanılıb.
İlkin araşdırma zamanı sürücü sükan arxasında yuxuya getdiyini və hadisənin necə baş verdiyini xatırlamadığını bildirib. O, əvvəllər də avtomobil idarə edərkən dəfələrlə yuxuya getdiyini qeyd edib.
Rövşən Tağıyev bildirib ki, sükan arxasında dəfələrlə yuxuya getdiyini bilə-bilə yenidən yola çıxmaq bağışlanmaz səhvdir.
Yuxulu halda avtomobil idarə etməmək, yolda yuxu gəldikdə isə təhlükəsiz yerdə dayanmaq sürücünün özündən asılıdır. Yorğunluğa baxmayaraq hərəkəti davam etdirmək həm sürücünün, həm də digər hərəkət iştirakçılarının həyatını təhlükə altına qoyur. Belə bir qərar ağır qəza ilə yanaşı, sürücünün uzun müddət azadlıqdan məhrum edilməsinə də səbəb ola bilər.
