Bakı Metropolitenində Qırmızı və Yaşıl xətlərin ayrılması layihəsinin tikinti mərhələsinə avqustun 15-dən başlanılması planlaşdırılır.
Layihə çərçivəsində “Nizami”–”28 May” istiqamətində mövcud tunel istismardan çıxarılaraq ləğv ediləcək. Onun əvəzində “Nizami”–”Cəfər Cabbarlı” istiqamətində iki yeni metro tuneli inşa olunacaq. Tikinti işlərinin təxminən 10 aya başa çatdırılması nəzərdə tutulur.
Tikinti dövründə sərnişindaşımanın təmin edilməsi məqsədilə M1–M6 indeksli 6 müvəqqəti ekspres avtobus marşrutu fəaliyyət göstərəcək. Bu marşrutlara 87 avtobus cəlb olunacaq, həmçinin mövcud avtobus xətlərinə əlavə 97 avtobus buraxılacaq.
Layihə başa çatdıqdan sonra Qırmızı və Yaşıl xətlər tam müstəqil fəaliyyət göstərəcək. Bu, bir xəttdə yaranan nasazlıq və ya gecikmənin digər xəttin hərəkətinə təsir etməsinin qarşısını alacaq. Eyni zamanda, “28 May” stansiyasında platforma yüklənməsi və sərnişin sıxlığının əhəmiyyətli dərəcədə azalacağı gözlənilir.
