BMT və digər beynəlxalq təşkilatlar Azərbaycana qarşı törədilmiş təcavüzün və beynəlxalq hüququn ciddi pozuntularının qarşısını ala, həmçinin Azərbaycan ərazilərinin təxminən üç onillik davam edən işğalına son qoya bilməyib.
Bunu Azərbaycanın BMT yanında Daimi Nümayəndəliyində I katib Tale Əliyev BMT Təhlükəsizlik Şurasının “Silahlı münaqişə vəziyyətlərində beynəlxalq hüququn qorunması” mövzusunda Arria formulası üzrə keçirilən iclasında bildirib.
Onun sözlərinə görə, Azərbaycanın təcrübəsi beynəlxalq sistemin məhdudiyyətlərini göstərir.
“İlk tələb olunan beynəlxalq hüquqa riayət etmək və məsuliyyəti təmin etmək üçün siyasi iradədir. Silahlı münaqişələrdə bəzi əməllər beynəlxalq hüquqa əsasən ciddi cinayətlər təşkil edir və imperativ normalarla (jus cogens) qadağan olunur, eyni zamanda bütövlükdə beynəlxalq ictimaiyyət qarşısında öhdəliklərin (erga omnes) ciddi şəkildə pozulmasını ehtiva edir”, – Tale Əliyev deyib.
O bildirib ki, beynəlxalq hüquqa əsasən dövlətlərin bu cür hüquqpozmaları araşdırmaq, məsuliyyət daşıyan şəxsləri mühakimə etmək və onların ədalət mühakiməsinə cəlb olunmasını təmin etmək öhdəliyi var.
