Ermənistanın xarici işlər naziri Ararat Mirzoyan ABŞ-nin sülhməramlı missiyalar üzrə xüsusi elçisinin baş müşaviri Arye Laytstounla görüşüb. Tərəflər görüşdə “Tramp marşrutu” (TRIPP) layihəsinin icrasını müzakirə ediblər.
Ermənistan Xarici İşlər Nazirliyinin məlumatına görə, görüşdə 2025-ci il avqustun 8-də Vaşinqtonda keçirilmiş sülh sammitindən sonra Cənubi Qafqazda sülh prosesində əldə olunan irəliləyiş qiymətləndirilib. Tərəflər Bakı ilə İrəvan arasında sülhün regionun inkişafı üçün vacib olduğunu vurğulayıblar.
Danışıqlarda həmçinin ticarət-iqtisadi əməkdaşlıq, Ermənistanın iqtisadi və enerji dayanıqlığının gücləndirilməsi məsələləri də müzakirə olunub.
Bundan əlavə, regional əməkdaşlığın genişləndirilməsi, TRIPP proqramının ən qısa zamanda həyata keçirilməsi və Ermənistanın beynəlxalq nəqliyyat-infrastruktur sisteminə inteqrasiyası yolları ətrafında fikir mübadiləsi aparılıb.
