İyulun 31-də Azərbaycanda havanın əsasən yağmursuz keçəcəyi gözlənilsə də, bəzi dağlıq və dağətəyi rayonlarda qısamüddətli yağış yağacağı, şimşək çaxacağı ehtimal olunur.
Bakıda və Abşeron yarımadasında hava əsasən yağmursuz olacaq. Arabir güclənən şimal-qərb küləyi günün ikinci yarısında şimal-şərq küləyi ilə əvəz olunacaq.
Paytaxtda havanın temperaturu gecə 22-25°, gündüz 29-33° isti olacaq. Atmosfer təzyiqi 761 mm civə sütunu, nisbi rütubət gecə 70-75 %, gündüz isə 50-55 % təşkil edəcək.
Rayonlarda gecə 22-27°, gündüz 34-38° isti, dağlıq ərazilərdə isə gecə 15-20°, gündüz 23-28° isti proqnozlaşdırılır. Bəzi dağlıq ərazilərdə arabir duman müşahidə olunacaq.
