Rusiya Xarici İşlər Nazirliyi (XİN) Azərbaycanın xarici işlər naziri Ceyhun Bayramovun 16-17 iyul tarixlərində Moskvaya rəsmi səfəri ərəfəsində bəyanat yayıb.
Bəyanatda bildirilib ki, səfər çərçivəsində Ceyhun Bayramov rusiyalı həmkarı Sergey Lavrovla görüşəcək. Tərəflər Azərbaycan-Rusiya münasibətlərinin hazırkı vəziyyətini və inkişaf perspektivlərini, həmçinin regional və beynəlxalq gündəmdəki aktual məsələləri müzakirə edəcək.
Rusiya XİN Azərbaycanı Cənubi Qafqaz və Xəzər regionunda mühüm tərəfdaş adlandıraraq, iki ölkə arasında münasibətlərin dostluq, qarşılıqlı hörmət və bərabərhüquqluluq prinsipləri əsasında inkişaf etdiyini vurğulayıb.
Bəyanatda qeyd olunub ki, hazırda Azərbaycan və Rusiya arasında 150-dən çox beynəlxalq hüquqi sənəd qüvvədədir. Moskva 2022-ci il fevralın 22-də imzalanmış Müttəfiqlik Qarşılıqlı Fəaliyyəti haqqında Bəyannamənin potensialının tam reallaşdırılmasında maraqlı olduğunu bildirib.
Tərəflərin gündəliyində ticarət-iqtisadi, mədəni-humanitar, təhsil və regionlararası əməkdaşlığın genişləndirilməsi də yer alacaq. Rusiya XİN-in məlumatına görə, Azərbaycanda Rusiya kapitallı 1400-dən çox şirkət fəaliyyət göstərir, Rusiyada isə 9 mindən artıq Azərbaycan vətəndaşı ali təhsil alır.
Bəyanatda “3+3” regional əməkdaşlıq platformasının əhəmiyyəti də vurğulanıb. Rusiya bu formatın region ölkələrinin problemləri kənar müdaxilə olmadan həll etməsinə xidmət etdiyini qeyd edib.
Moskva, həmçinin Azərbaycan-Ermənistan münasibətlərinin tam normallaşdırılması, sülh sazişinin imzalanması, sərhədlərin delimitasiyası və nəqliyyat-kommunikasiya xətlərinin açılması istiqamətində dəstək verməyə hazır olduğunu bəyan edib.
Rusiya XİN Bayramovun səfərini iki ölkə arasında siyasi dialoqun davamı və qarşılıqlı faydalı əməkdaşlığın genişləndirilməsi baxımından mühüm qiymətləndirib.
