Bakının Nardaran qəsəbəsində və Sumqayıtın H.Z. Tağıyev qəsəbəsində dənizdə batmaq təhlükəsi ilə üzləşən iki nəfər xilas olunub.
Fövqəladə Hallar Nazirliyindən bildirilib ki, “112” qaynar telefon xəttinə nəzarətsiz ərazilərdə iki nəfərin batma təhlükəsi ilə üzləşməsi barədə məlumat daxil olub. Hadisə yerlərinə dərhal Nazirliyin Kiçikhəcmli Gəmilərə Nəzarət və Sularda Xilasetmə Dövlət Xidmətinin dalğıc-xilasediciləri cəlb edilib.
Əməliyyat nəticəsində 1997-ci il təvəllüdlü Cəfər Əlizadə Nardaran qəsəbəsində, 1996-cı il təvəllüdlü Ceyhun Quliyev isə H.Z. Tağıyev qəsəbəsində təhlükəsiz şəkildə sahilə çıxarılıb.
