Fövqəladə Hallar Nazirliyi (FHN) yaxın günlərdə gözlənilən qeyri-sabit hava şəraiti ilə əlaqədar vətəndaşları sel, daşqın və güclü külək təhlükəsinə qarşı ehtiyatlı olmağa çağırıb.
Milli Hidrometeorologiya Xidmətinin proqnozuna əsasən, günün ikinci yarısından başlayaraq qarşıdakı günlərdə ölkə ərazisində, o cümlədən Bakı və Abşeron yarımadasında hava şəraiti qeyri-sabit olacaq. Güclü külək, intensiv yağıntılar və şimşək gözlənilir. Bəzi dağ çaylarında qısamüddətli sel və daşqın ehtimalı var.
FHN güclü külək zamanı vətəndaşlara yüngül konstruksiyalı və müvəqqəti tikililərdən, bina və reklam lövhələrindən uzaq durmağı, elektrik dirəklərinin, naqillərinin və hündür ağacların yaxınlığında dayanmamağı tövsiyə edib.
Nazirlik küləkli havada yanğın təhlükəsizliyi qaydalarına xüsusi diqqət yetirilməsinin vacibliyini də vurğulayıb. Qeyd olunub ki, güclü külək yanğınların söndürülməsini çətinləşdirir. Kiçikhəcmli gəmi sahibləri isə belə hava şəraitində dənizə çıxmağın qadağan olduğunu nəzərə almalıdırlar.
İntensiv yağıntılar nəticəsində sel, daşqın və subasma təhlükəsi yaranarsa, vətəndaşlara təhlükəli ərazilərdən uzaq durmaq, hadisə ilə qarşılaşdıqda dərhal ən yaxın hündür əraziyə çıxmaq və xilasetmə qüvvələrinin göstərişlərinə əməl etmək tövsiyə olunur.
FHN ildırım zamanı elektrik avadanlıqlarını şəbəkədən ayırmağı, telefonla danışmaqdan çəkinməyi, elektrik xətlərindən, ildırımötürücülərdən, navalçalardan və antenalardan uzaq durmağı məsləhət görüb. Həmçinin hündür ağacların altında sığınmaq olmaz.
Avtomobil idarə edənlərə isə hərəkəti dayandırmaq, pəncərələri bağlamaq və ildırım təhlükəsi sovuşanadək gözləmək tövsiyə edilib.
