Azərbaycan Prezidenti İlham Əliyev iyulun 29-da Dünya Güləş Birliyinin prezidenti Nenad Laloviçi qəbul edib.
Görüşdə dövlət başçısı ilə Nenad Laloviç arasında əvvəlki görüşlər məmnunluqla xatırlanıb.
Qonaq Bakıda keçirilən 17 yaşadək güləşçilər arasında dünya çempionatının yüksək səviyyədə təşkil olunduğunu vurğulayaraq, göstərilən dəstəyə görə Prezident İlham Əliyevə təşəkkür edib. O, Azərbaycanda güləşin inkişafını və Azərbaycan Güləş Federasiyası ilə uğurlu əməkdaşlığı xüsusi qeyd edib.
Prezident İlham Əliyev isə U-17 dünya çempionatının gənc idmançıların gələcək uğurları baxımından əhəmiyyətini vurğulayıb, Azərbaycanın bundan sonra da beynəlxalq idman yarışlarına ev sahibliyi etməsinin vacibliyini bildirib.
Dövlət başçısı Azərbaycan güləşçilərinin beynəlxalq arenada mühüm nailiyyətlər əldə etdiyini qeyd edib.
Görüşdə Azərbaycanda güləşin zəngin ənənələrə malik olduğu və bu idman növünün inkişafı üçün dövlət səviyyəsində həyata keçirilən tədbirlərdən bəhs olunub. Tərəflər, həmçinin Azərbaycan ilə Dünya Güləş Birliyi arasında əməkdaşlığın perspektivlərini müzakirə ediblər.
