Azərbaycan, Türkiyə və Özbəkistan hərbi qulluqçularının iştirakı ilə keçirilən “Birliyin Gücü – 2026” birgə hərbi təlimində şərti düşmənin hava hədəflərinə zərbələr endirilib.
Müdafiə Nazirliyindən bildirilib ki, təlimin planına uyğun olaraq şəxsi heyət, silah və texnika, eləcə də aviasiya vasitələri cəlb edilməklə müxtəlif təlim-döyüş ssenariləri üzrə praktiki tapşırıqlar icra olunur.
Aviasiya vasitələri müəyyən edilmiş marşrutlar üzrə müxtəlif yüksəkliklərdə manevrlər edir. Şərti düşmənin hava hədəflərinə, radar və zenit-raket komplekslərinə, hərbi texnikasına və terrorçuların yerüstü mövqelərinə zərbələr endirilir.
Məşqlərin məqsədi pilotların praktiki vərdişlərini təkmilləşdirmək, aviasiya vasitələrinin şəxsi heyətlə uzlaşmış fəaliyyətini təmin etmək və onların mürəkkəb hava və relyef şəraitində qarşıya qoyulan tapşırıqları yerinə yetirmək qabiliyyətlərini yoxlamaqdır.
