Dövlət Qulluğu Məcəlləsinin layihəsi dövlət qulluğu ilə bağlı qaydaların vahid sənəddə birləşdirilməsini nəzərdə tutur.
Layihə Milli Məclisin Hüquq siyasəti və dövlət quruculuğu komitəsinin iclasında müzakirə olunub.
Məcəllə qüvvəyə minərsə, hazırda dövlət qulluğu ilə bağlı bir neçə qanunda olan qaydalar vahid Məcəllədə toplanacaq. Bununla yanaşı, bir sıra qanunların qüvvədən düşməsi nəzərdə tutulur.
Qüvvədən düşməsi planlaşdırılan qanunlar arasında “Dövlət qulluğu haqqında”, dövlət qulluqçularının iş vaxtı, maaşlarına tətbiq olunan əmsallar, Dövlət Qulluğunu İdarəetmə Şurası və etik davranış qaydaları ilə bağlı qanunlar da var.
Digər normativ hüquqi aktların da yeni Məcəlləyə uyğunlaşdırılması üçün keçid mexanizmi müəyyən ediləcək. Bu proses başa çatanadək həmin sənədlər yalnız Məcəlləyə zidd olmayan hissədə tətbiq olunacaq.
