Milli Hidrometeorologiya Xidmətinin məlumatına əsasən, ölkənin bəzi ərazilərində müşahidə olunan qeyri-sabit hava şəraitinin avqustun 14-dək davam edəcəyi, fasilələrlə yağış yağacağı, bəzi yerlərdə yağıntıların leysan xarakterli və intensiv olacağı gözlənilir.
Bununla əlaqədar Baş Dövlət Yol Polisi İdarəsi (BDYPİ) sürücülərə hava və yol şəraitini nəzərə alaraq, nəqliyyat vasitələrini idarə edərkən diqqətli və ehtiyatlı olmağı tövsiyə edib.
Yağıntılı və görmə məsafəsinin məhdud olduğu şəraitdə sürət həddinin aşağı salınması, nəqliyyat vasitələri arasında ara məsafəsinin artırılması, qəfil manevrlərdən və kəskin tormozlamalardan çəkinilməsi, avtomobilin işıq cihazlarından düzgün istifadə olunması tövsiyə edilir.
BDYPİ piyadaları da yağışlı havada yollarda xüsusilə diqqətli olmağa çağırıb. Bildirilib ki, görmə məsafəsinin azalması və yol örtüyünün sürüşkən olması nəqliyyat vasitələrinin dayanma məsafəsini artıra bilər.
Bu səbəbdən piyadaların yolu yalnız müəyyən edilmiş keçidlərdən keçməsi, yolun hərəkət hissəsinə qəfil çıxmaması və keçid zamanı diqqəti yayındıran cihazlardan istifadə etməməsi tövsiyə olunub.
BDYPİ yol hərəkəti iştirakçılarını əlverişsiz hava şəraitində qaydalara ciddi əməl etməyə, diqqətli və məsuliyyətli davranmağa çağırıb.
