Türkiyəli müğənni Murat Boz və Ayazağa ərazisində yerləşən “Phoenix” studiyalarında köməksiz vəziyyətdə qalan yüzlərlə əməkdaş təxliyə edilib.
Türkiyə mətbuatının məlumatına görə, oktyabrın 14-də İstanbulda yağan güclü leysan Sarıyer rayonunun Ayazağa və Maslak ərazilərində su basmasına səbəb olub. Suyun səviyyəsi sürətlə yüksəlib, studiyanın ərazisini su basıb və elektrik enerjisinin verilişi dayanıb.
Murat Boz sosial şəbəkədə paylaşdığı görüntülərdə təxminən 200–250 nəfərin studiyada köməksiz vəziyyətdə qaldığını bildirib. O, yolların təxminən iki metr su altında qaldığını deyərək aidiyyəti qurumlardan təcili yardım və təxliyə istəyib.
Müğənninin sözlərinə görə, əməkdaşların bir hissəsi təhlükəsizlik məqsədilə binanın yuxarı mərtəbəsinə çıxarılıb. Daha sonra xilasetmə qüvvələri əraziyə çatıb və insanlar səhər saatlarında təxliyə olunublar. Murat Boz da təxliyə zamanı qayıqla ərazidən çıxarıldığı anları sosial şəbəkədə paylaşıb.
