Yeni tədris ilinə hazırlıq çərçivəsində Bakı Şəhəri üzrə Təhsil İdarəsinin tabeliyində olan 7 təhsil müəssisəsində tikinti və əsaslı təmir işləri davam edir.
Hazırda 57, 68 və 141 nömrəli məktəblər sökülərək yenidən tikilir. İncəsənət Gimnaziyası, 352 nömrəli uşaq bağçası, Nəriman Qəhrəmanov adına körpələr evi-uşaq bağçası və Etibar Ömərov adına uşaq bağçasında isə əsaslı təmir işləri aparılır.
Bununla yanaşı, ehtiyac olan digər təhsil müəssisələrində cari təmir və mühəndis-kommunikasiya işləri həyata keçirilir.
Qeyd edək ki, 2025–2026-cı tədris ili ərzində 59, 151, 313 və 324 nömrəli məktəblərdə, həmçinin 101 və 351 nömrəli uşaq bağçalarında yenidənqurma və təmir işləri başa çatdırılıb. Bundan əlavə, 99, 116, 257 və 328 nömrəli, eləcə də A. Məmmədov adına uşaq bağçaları əsaslı təmirdən sonra istifadəyə verilib.
