“Euronews” telekanalı Dubayda keçirilən Ərəb Media Forumunun yekunlarına dair material hazırlayıb.
Materialda Azərbaycan Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyevin Bakı ilə İrəvan arasında sülh prosesi ilə bağlı fikirlərinə yer verilib.
Telekanal H.Hacıyevin Ermənistanla sülhə nail olmağın “çətin mübarizə” olduğunu söylədiyini qeyd edib.
Hacıyev Azərbaycanın öz suveren ərazisində xristian irsinin qorunmasına sadiq olduğunu da vurğulayıb. Onun sözlərinə görə, bu irs Azərbaycanın tarixinin bir hissəsidir.
“İndi biz müharibəni qazanmışıq, lakin biz sülh dövründə də qalib gəlirik, bu isə asan məsələ deyil. Qarabağın və Şərqi Zəngəzurun işğalının bütün illəri ərzində məscidlərimiz, islam mədəni irsimiz Ermənistan tərəfindən tamamilə məhv edilib – hətta məscidlərə donuzlar salınırdı”, – “Euronews” H.Hacıyevdən sitat gətirib.
Telekanalın məlumatına görə, H.Hacıyev çıxışı zamanı Azərbaycanın islam sivilizasiyasına mənsub olmasına baxmayaraq, ölkədə islam, xristianlıq və iudaizmin mövcud olduğunu, məscid, kilsə və sinaqoqların fəaliyyət göstərdiyini bildirib.
“Azərbaycan öz suveren ərazisində xristian irsinin qorunmasına sadiqdir, çünki bu, bizim mədəni irsimizdir”, – telekanal H.Hacıyevin sözlərini sitat gətirib.
Materialda həmçinin Azərbaycanın rəsmi mövqeyinə istinadla Ermənistan və erməni diasporundakı revanşist qüvvələrin sülh prosesinə mane olmağa çalışdığı barədə fikirlər yer alıb.
