Polşa Prezidenti Karol Navrotski Konstitusiya Məhkəməsinin sədri və digər hakimlərlə təcili müşavirə çağırıb. Məhkəmə binasının qarşısında etirazlar fonunda polis ərazidə təhlükəsizliyi təmin etməyə çalışır.
Məlumata görə, hüquq-mühafizə orqanlarının əməkdaşları səsgücləndiricilər vasitəsilə jurnalistlərə, deputatlara və mühafizə olunan şəxslərə ərazini tərk etmələri barədə çağırış edirlər. Paytaxta əlavə polis qüvvələrinin cəlb olunduğu da bildirilir.
Gərginliyə Konstitusiya Məhkəməsinin hakimi Anna Korvin-Petrovskayanın müraciəti səbəb olub. O, məhkəmə hakimlərinin və əməkdaşlarının həyat və sağlamlığı üçün mümkün təhlükə, eləcə də ictimai asayişin pozulması riski barədə xəbərdarlıq edib.
Polşanın baş prokuroru Valdemar Jurek də Baş Polis Komendantlığına məktub göndərərək məhkəmənin təhlükəsizliyinə xüsusi diqqət yetirilməsini istəyib.
Vəziyyətin əsas səbəbi Konstitusiya Məhkəməsinin rəhbərliyi ətrafında yaranmış mübahisədir. Qurumun saytında sədr Boqdan Şvençkovskinin və sədr müavini Bartlomey Sohanskinin səlahiyyətlərinin icrasının dayandırıldığı barədə məlumat dərc olunub. Məhkəmədə ən uzun iş stajına malik hakim olan Anna Korvin-Petrovskayanın quruma rəhbərlik edəcəyi ehtimal edilib.
Lakin Konstitusiya Məhkəməsinin “X” sosial şəbəkəsindəki rəsmi hesabında saytın qanunsuz ələ keçirildiyinin ehtimal olunduğu bildirilib. Açıqlamada Şvençkovskinin məhkəmə sədri vəzifəsini icra etməyə davam etdiyi, Korvin-Petrovskayanın isə Konstitusiya Məhkəməsinin hakimi kimi tanınmadığı vurğulanıb.
Bəyanatda hadisələrin iştirakçıları dövlət çevrilişinə cəhddə ittiham olunublar.
