Abşeron rayonunun Xırdalan şəhərində yerləşən “AAAF Park” yaşayış kompleksinin ərazisindəki uşaq əyləncə mərkəzində yanğın baş verib.
Fövqəladə Hallar Nazirliyinin (FHN) məlumatına görə, hadisə ilə bağlı “112” qaynar telefon xəttinə məlumat daxil olduqdan sonra əraziyə Dövlət Yanğından Mühafizə və Xüsusi Riskli Xilasetmə xidmətlərinin qüvvələri cəlb edilib.
Yanğın yaxınlıqdakı yaşayış binalarına və digər obyektlərə yayılmasına imkan verilmədən tam söndürülüb. Hadisə nəticəsində xəsarət alan olmayıb.
