Ucar rayonunda ölümlə nəticələnən ağır yol-nəqliyyat hadisəsi baş verib.
Hadisə Bakı–Qazax magistral avtomobil yolunun rayonun Qarabörk kəndi ərazisindən keçən hissəsində qeydə alınıb.
“Xəbər Mərkəzi” “Report”a istinadən xəbər verir ki, hərəkətdə olan “Mercedes Atego” markalı yük maşını yol kənarında dayanan “Chevrolet Cobalt” markalı minik avtomobilinə çırpılıb. Zərbənin təsirindən minik avtomobili yoldan çıxaraq kənarda dayanan iki piyadanı vurub.
Nəticədə piyadalardan biri hadisə yerində, minik avtomobilinin sərnişini isə xəstəxanaya aparılarkən yolda həyatını itirib.
Qəza zamanı minik avtomobilinin sürücüsü və daha iki sərnişin müxtəlif dərəcəli xəsarətlərlə xəstəxanaya yerləşdirilib.
Faktla bağlı araşdırma aparılır.
