Zimbabvedə Kariba gölündə baş verən bərə qəzasında ölənlərin sayı 80 nəfərə çatıb.
Bu barədə Zimbabve Milli Polis Xidməti məlumat yayıb.
Bildirilib ki, avqustun 11-də baş verən qəza ilə bağlı axtarış-xilasetmə əməliyyatları zamanı daha 8 nəfərin meyiti tapılıb və bununla da ölənlərin sayı 80-ə yüksəlib. Ərazidə axtarışlar davam etdirilir. Əməliyyata peşəkar xilasedicilərlə yanaşı, yerli qayıqçılar da cəlb olunub.
Qeyd edək ki, qəza zamanı bərənin göyərtəsində 90 nəfər üçün nəzərdə tutulan tutumdan xeyli çox sərnişin olub. İlkin məlumatlara görə, gəmidə 114 yetkin sərnişin və 5 ekipaj üzvü olub, uşaqların sayı isə dəqiq müəyyən edilməyib. Güclü külək və dalğalı hava şəraitinin, eləcə də həddindən artıq yüklənmənin bərənin aşmasına səbəb olduğu bildirilir.
