ABŞ Silahlı Qüvvələrinin Mərkəzi Komandanlığı (CENTCOM) İranın cənubundakı Sirik şəhərində toy mərasiminin keçirildiyi məkana endirilən zərbənin hallarını araşdırır.
ABŞ rəsmisinin sözlərinə görə, hərbçilərin hadisə ilə bağlı hələ tam məlumatı yoxdur və insidentin bütün təfərrüatları təhlil edilir.
“Biz hadisə yerində birbaşa deyilik. Buna görə də ekspertlərimizə vəziyyəti təhlil etmək imkanı verməliyik. Təbii ki, bunu araşdırırıq, çünki nə baş verdiyini bilmirik”, – deyə rəsmi bildirib.
“Armament Research Services” (ARES) tədqiqat xidmətinin eksperti isə zərbənin ABŞ istehsalı olan yüksək dəqiqlikli silahla endirilmiş ola biləcəyini deyib.
Daha əvvəl CENTCOM İran ərazisindəki hədəflərə silsilə zərbələr endirildiyini açıqlayıb. İranın cənub sahillərində, o cümlədən Qeşm adasında və bir sıra şəhərlərdə partlayış səslərinin eşidildiyi bildirilib.
İran Qızıl Aypara Cəmiyyətinin nümayəndəsinin məlumatına görə, Sirikdə toy mərasiminin keçirildiyi məkana zərbə nəticəsində 5 nəfər ölüb, azı 68 nəfər yaralanıb.
