Avqustun 29-da Şəki rayonunun Baş Zəyzid kəndinin dağlıq ərazisində itlərin hücumuna məruz qalaraq ağır xəsarətlər alan Niderland vətəndaşı Dövlət Sərhəd Xidmətinin (DSX) əməkdaşları tərəfindən xilas edilib.
Turizm məqsədilə avqustun 26-da Frankfurt–Bakı aviareysi ilə Azərbaycana gələn Niderland vətəndaşı avqustun 29-da səhər saatlarında Şəkinin dağlıq ərazisində piyada yürüşə çıxıb.
Turist Baş Zəyzid kəndinin Çələngi yaylağı istiqamətində hərəkət edərkən itlərin hücumuna məruz qalıb. Nəticədə onun başından və bədənindən çoxsaylı açıq yara xəsarətləri aldığı müəyyən edilib.
Hadisə barədə saat 17:00 radələrində DSX-nin Sərhəd Qoşunlarının “Şəki” sərhəd dəstəsinə məlumat daxil olub.
Ağır yaralanan şəxsin təxliyəsi üçün DSX-nin Xüsusi Hava Əməliyyatları Qüvvələri Komandanlığının helikopteri ilə əraziyə tibb heyəti və xilasetmə qrupu göndərilib.
Dəniz səviyyəsindən 2 000 metr yüksəklikdə, qaranlıq hava şəraitində və çətin dağlıq relyefdə həyata keçirilən xilasetmə əməliyyatı nəticəsində turistə hadisə yerində ilkin tibbi yardım göstərilib.
Daha sonra yaralı Niderland vətəndaşı helikopterlə Şəki Rayon Mərkəzi Xəstəxanasına çatdırılıb və orada təcili əməliyyat olunub.
