Suriyadan 7-si qadın, 9-u uşaq olmaqla ümumilikdə 16 Azərbaycan vətəndaşı iyulun 18-19-da repatriasiya olunaraq ölkəyə gətirilib.
Xarici İşlər Nazirliyinin məlumatına görə, repatriasiya prosesindən əvvəl vətəndaşların yeri, şəxsiyyəti və Azərbaycan vətəndaşlığı müəyyənləşdirilib. Suriyaya ezam olunan aidiyyəti dövlət qurumlarının nümayəndələri tərəfindən onların ilkin tibbi və psixoloji müayinəsi aparılıb.
Azərbaycanın Suriya və Türkiyədəki diplomatik nümayəndəlikləri, eləcə də İstanbuldakı Baş Konsulluğun koordinasiyası ilə repatriantlar qayıdış şəhadətnamələri və aviabiletlərlə təmin edilərək ölkəyə gətiriliblər.
Bildirilib ki, repatriasiya olunan şəxslərin sosial reabilitasiyası və cəmiyyətə reinteqrasiyası istiqamətində müvafiq tədbirlər görüləcək. Azərbaycan hökuməti xarici ölkələrdə silahlı münaqişələrin qurbanı olmuş vətəndaşların repatriasiyasını bundan sonra da davam etdirəcək.
