“Sabah” Futbol Klubunun UEFA Çempionlar Liqasındakı oyunu ilə əlaqədar oktyabrın 13-də Bakı metrosunda gücləndirilmiş iş rejimi tətbiq olunacaq.
Bakı Olimpiya Stadionunda keçiriləcək qarşılaşma zamanı Qırmızı xətt üzrə sərnişindaşıma xidmətinin təşkili gücləndiriləcək.
Bu məqsədlə “Koroğlu” stansiyasında əlavə işçi qüvvəsi cəlb olunacaq və nəzarət artırılacaq. Qatarların hərəkəti gün ərzində payız-qış qrafikinə uyğun təşkil ediləcək.
Oyundan sonra sərnişin axınının artması səbəbindən ehtiyac yaranarsa, ehtiyat qatarlar xəttə buraxılacaq.
Yaşıl və Bənövşəyi xətlər üzrə qatarların hərəkət qrafikində isə dəyişiklik edilməyəcək.
