Rusiya ordusunun Ukraynanın Çerniqov, Dnepropetrovsk və Xarkov vilayətlərinə endirdiyi zərbələr nəticəsində 4 mülki şəxs həlak olub, daha 16 nəfər yaralanıb.
Ukrayna rəsmilərinin məlumatına görə, ötən sutka ərzində hücumlarda reaktiv yaylım atəş sistemləri, raketlər, idarəolunan aviabombalar və müxtəlif tipli pilotsuz uçuş aparatlarından istifadə olunub.
Xarkov Vilayət Hərbi Administrasiyasının rəhbəri Oleq Sinequbov bildirib ki, Xarkov şəhəri və vilayətin daha 18 yaşayış məntəqəsi hücuma məruz qalıb. Nəticədə 2 nəfər ölüb, 15 nəfər yaralanıb.
Çerniqov şəhərində isə zərbə dronu inzibati binaya düşüb. Hücum nəticəsində binaya ziyan dəyib, yanğın baş verib və 1 nəfər xəsarət alıb.
Dnepropetrovsk Vilayət Hərbi Administrasiyasının rəhbəri Aleksandr Qanjanın sözlərinə görə, vilayətin iki rayonuna pilotsuz uçuş aparatları ilə 10-dan çox hücum edilib. Zərbələr nəticəsində 2 nəfər həlak olub, mülki infrastruktura ziyan dəyib.
