Azərbaycan Prezidenti İlham Əliyev sentyabrın 29-da Beynəlxalq Futbol Federasiyaları Assosiasiyasının (FIFA) prezidenti Canni İnfantinonu qəbul edib.
Görüşdə Azərbaycanda futbolun inkişafı və ölkə ilə FIFA arasında əməkdaşlığın perspektivləri müzakirə olunub.
İlham Əliyev dünyada, o cümlədən Azərbaycanda futbolun dövlət səviyyəsində inkişafı ilə bağlı görülən işlərə verdiyi dəstəyə görə Canni İnfantinoya təşəkkür edib.
Dövlət başçısı gələn ay Azərbaycanda ilk dəfə keçiriləcək 15 yaşadək oğlan futbolçular arasında dünya çempionatı və festivalına (FIFA U-15 World Cup and Festival), həmçinin 2027-ci ildə təşkil olunacaq 20 yaşadək kişi futbolçular arasında dünya çempionatına (FIFA U-20 World Cup) hazırlıq işlərinin yüksək səviyyədə aparıldığını bildirib.
İlham Əliyev Azərbaycanın bu idman tədbirlərində iştirakının önəmini vurğulayaraq, onların ümumilikdə regionda futbolun inkişafına töhfə verəcəyinə ümidvar olduğunu bildirib.
Canni İnfantino qəbula görə dövlət başçısına minnətdarlığını bildirib. O, ilk dəfə Azərbaycanda keçiriləcək U-15 dünya çempionatı və festivalının əhəmiyyətinə toxunaraq, dünyanın idman ictimaiyyətinin diqqətinin bu tədbirə yönələcəyini deyib.
Görüşdə Azərbaycan futbolunun inkişafı ilə bağlı görülən işlərə və son dövrlərdə əldə olunan uğurlara toxunulub.
Azərbaycan ilə FIFA arasında uğurlu əməkdaşlığın qurulduğu vurğulanıb və tərəfdaşlığın perspektivləri müzakirə olunub. Söhbət zamanı Azərbaycan Futbol Federasiyaları Assosiasiyasının (AFFA) FIFA-nın fəaliyyətinə verdiyi dəstək də məmnunluqla qeyd edilib.
Görüşün sonunda Canni İnfantino Prezident İlham Əliyevə xatirə hədiyyələri təqdim edib.
