Binəqədi rayonunun Dalğa küçəsində svetoforların vaxt planında dəyişiklik edilib.
Daxili İşlər Nazirliyinin Nəqliyyatı İntellektual İdarəetmə Mərkəzinin əməkdaşları hərəkət iştirakçılarının intensivliyi və nəqliyyat axınının mövcud vəziyyətini nəzərə alaraq Dalğa küçəsindən Binəqədi şosesi istiqamətində hərəkətin tənzimlənməsi ilə bağlı təhlillər aparıblar.
Təhlillər əsasında svetoforların vaxt planı dəyişdirilib və faza müddəti 7 saniyə artırılıb.
Nəticədə günün pik saatlarında Dalğa küçəsində yaranan nəqliyyat sıxlığının uzunluğu 285 metrdən 180 metrə qədər azalıb. Bu, təxminən 37 faizlik azalma deməkdir.
Qeyd edilib ki, Mərkəz tərəfindən paytaxt yollarında nəqliyyat axınının vəziyyəti mütəmadi olaraq təhlil olunur və zərurət yarandıqda svetoforların iş rejimlərinin optimallaşdırılması istiqamətində tədbirlər görülür.
