Azərbaycan Prezidenti İlham Əliyev Qırğızıstan Prezidenti Sadır Japarov, Özbəkistan Prezidenti Şavkat Mirziyoyev və Tacikistan Prezidenti Emoməli Rəhmon ilə birlikdə Çolpon-Ata şəhərində yerləşən “Issyk-Kul Golf Resort” kompleksində Qolf Klubun açılış mərasimində iştirak edib.
Əvvəlcə kompleks və Qolf Klub barədə videoçarx nümayiş olunub.
İssık-Kul gölünün sahilində yerləşən “Issyk-Kul Golf Resort”un ümumi sahəsi 120 hektardır. Bunun 103 hektarı Qolf Klubun payına düşür. Layihənin məqsədi İssık-Kula turist axınının təkcə yay aylarında deyil, ilin digər dövrlərində də artırılmasıdır. Klubda ilin 10 ayı qolf oynamaq mümkün olacaq.
Kompleksdə 80 yerlik mehmanxana, gələcəkdə qolf akademiyası və müxtəlif səviyyəli beynəlxalq turnirlərin təşkili nəzərdə tutulur. Burada həmçinin dörd və beşulduzlu hotellər, restoranlar və çimərlik zonaları fəaliyyət göstərəcək.
Qırğızıstan Qolf Federasiyasının prezidenti Xomeni Erqeşov və Qırğızıstan Prezidenti Sadır Japarov çıxış etdikdən sonra dövlət başçıları kompleksin ərazisini gəzib, qolf oyununun rəmzi başlama mərasimində iştirak ediblər.
