Ölümlə nəticələnən yol-nəqliyyat hadisəsi törətməkdə təqsirləndirilən Azərbaycan vətəndaşı Dadaş Balakişi oğlu Dadaşzadə Monteneqrodan Azərbaycana ekstradisiya olunacaq.
Baş Prokurorluğun məlumatına görə, Monteneqronun Ədliyyə Nazirliyinə göndərilən sorğu və beynəlxalq prosedurlara uyğun tələb olunan sənədlər təqdim edildikdən, eləcə də danışıqlar aparıldıqdan sonra onun Azərbaycana ekstradisiyasına razılıq əldə olunub.
Sabunçu Rayon Polis İdarəsində ibtidai istintaqı aparılan cinayət işi üzrə Dadaş Dadaşzadənin ölümlə nəticələnən yol-nəqliyyat hadisəsi törətməsinə dair əsaslı şübhələr müəyyən edilib. Bu səbəbdən onun təqsirləndirilən şəxs qismində cəlb olunması barədə qərar qəbul edilib.
İstintaqdan yayınaraq gizləndiyinə görə Dadaşzadə İnterpolun Milli Mərkəzi Bürosu vasitəsilə beynəlxalq axtarışa verilib. Həyata keçirilən tədbirlər nəticəsində onun Monteneqro ərazisində olduğu yer müəyyən edilib və saxlanılması təmin olunub.
Hazırda Dadaş Dadaşzadənin Azərbaycana gətirilməsi istiqamətində müvafiq tədbirlər görülür.
