Ermənistanın Baş naziri Nikol Paşinyan və Fransa Prezidenti Emmanuel Makron arasında Yelisey sarayında görüş keçirilib.
Ermənistan mediasının yaydığı məlumata görə, görüşdə ikitərəfli münasibətlərin əsas istiqamətlərindən biri kimi iqtisadi əməkdaşlığın inkişaf etdirilməsi müzakirə olunub.
Tərəflər Ermənistan iqtisadiyyatının şaxələndirilməsi istiqamətində atılan addımları qeyd ediblər. Paşinyan “Şimal-Cənub” strateji nəqliyyat dəhlizinin bir hissəsi olacaq Bərgüşad tunelinin tikintisində işlərin əsas mərhələyə keçdiyini bildirib.
Makron strateji əməkdaşlıq haqqında ikitərəfli bəyannaməyə uyğun olaraq münasibətlərin bütün istiqamətlərdə inkişaf etdirilməsinin vacibliyini vurğulayıb.
Görüşdə Ermənistanla Fransa arasında kosmik sahədə əməkdaşlığın dərinləşdirilməsi və regional proseslər də müzakirə olunub. Tərəflər sülhün möhkəmləndirilməsinə yönəlmiş addımların ardıcıl şəkildə həyata keçirilməsinin vacibliyini qeyd ediblər.
