Azərbaycan cüdoçusu Murad Fətiyev (90 kq) dünya çempionatında medalların sayının artacağına ümid etdiyini bildirib.
Bürünc medal qazanan idmançı jurnalistlərə açıqlamasında mundiala ciddi hazırlaşdıqlarını və üçüncü yer uğrunda görüşün gərgin keçdiyini deyib.
“Bu, çox ağır keçən bir dünya çempionatıdır. Komanda olaraq bu mundiala çox ciddi hazırlaşmışıq. 5-6 ay ciddi hazırlıq keçdik. Şükürlər olsun, komanda olaraq hər birimiz yaxşı çıxış edirik. Ümidimiz var ki, növbəti günlərdə də medallarımızın sayı artacaq. Mənim atam da cüdoçu olub. Onun ən böyük arzusu idi ki, dünya mükafatçısı olum. Tatami üzərinə çıxarkən atamı düşündüm”.
Qeyd edək ki, Murad Fətiyev bürünc medal uğrunda görüşdə serbiyalı Nemanya Maydovu məğlub edib.
