ABŞ hakimiyyəti keçmiş hərbçi Nidal Həsənin edamını canlı yayımlamağı planlaşdırır. ABŞ-ın müdafiə naziri Pit Heqset edamın 2026-cı il dekabrın 3-də, yerli vaxtla saat 13:00-da Texas ştatının Fort Hud hərbi bazasında həyata keçirilməsinin nəzərdə tutulduğunu bildirib.
Məlumata görə, edam güllələnmə yolu ilə həyata keçiriləcək. Müdafiə rəsmisi edamın canlı yayımlanacağını təsdiqləyib, lakin yayımın detalları barədə əlavə məlumat verilməyib.
ABŞ Prezidenti Donald Tramp Heqsetin tövsiyəsindən sonra edam qərarını təsdiqləyib. Güllələnmə üsulu ilə edam üçün prezidentin razılığı tələb olunur.
Nidal Həsən 2009-cu il noyabrın 5-də Fort Hud hərbi bazasında atəş açaraq 13 nəfəri öldürüb, 32 nəfəri yaralayıb. Həmin vaxt polis tərəfindən saxlanılarkən güllələnib və qismən iflic olub.
Hərbi məhkəmə 2013-cü ilin avqustunda Həsəni qəsdən adam öldürmə və öldürməyə cəhdlə bağlı 45 maddə üzrə təqsirli bilib və ölüm cəzasına məhkum edib. O, hadisədə iştirakını etiraf edərək məqsədinin ABŞ hərbçilərinin Əfqanıstana göndərilməsinin qarşısını almaq olduğunu bildirib.
