Bakıda keçirilən cüdo üzrə dünya çempionatında Azərbaycan millisi Avstriya yığmasına qalib gələrək 1/8 finala yüksəlib.
1/16 final mərhələsində rəqibi ilə qarşılaşan komandamız 4:0 hesablı qələbə qazanıb.
Azərbaycan millisinə ilk xalı qadınların +70 kq çəki dərəcəsində Madina Kaisinova qazandırıb. O, Mariya Höllvartı məğlub edib.
Daha sonra kişilərin +90 kq çəki dərəcəsində Zelim Kotsoyev Movli Borçaşvilini üstələyərək hesabı 2:0 edib.
57 kq çəki dərəcəsində Xədicə Qədəşova Laura Kallingerə qalib gəlib. Rəşid Məmmədəliyev isə 73 kq çəki dərəcəsində Firas Ben Saadı məğlub edərək yekun hesabı müəyyənləşdirib.
Beləliklə, Azərbaycan millisi 4:0 hesablı qələbə ilə vaxtından əvvəl növbəti mərhələyə adlayıb. Komandamız 1/8 finalda Yaponiya yığması ilə qarşılaşacaq.
