İranda casusluqda və İsrailin “Mossad” kəşfiyyat xidməti ilə əməkdaşlıqda ittiham olunan Hoseyn Paderan barəsində çıxarılan ölüm hökmü icra edilib.
İran mediasının məlumatına görə, hökm Paderanın apellyasiya şikayətinin rədd edilməsindən və İran Ali Məhkəməsi tərəfindən təsdiqlənməsindən sonra həyata keçirilib.
İran məhkəmə hakimiyyəti Paderanın “Mossad”a məxfi hərbi məlumatlar ötürmək ittihamı ilə saxlanıldığını bildirib. İddialara görə, o, hərbi obyektlər və əməkdaşlar barədə məlumatları, həmçinin onların bəzi şəxsi məlumatlarını toplayaraq kəşfiyyat xidmətindəki kuratoruna ötürüb.
Məlumata görə, Paderan bu məlumatların qarşılığında avro ilə pul alıb. Məhkəmənin açıqlamasında onun evində üzərində “tam məxfi” qeydi olan raket mövzusunda materialların yer aldığı dəftərçə, şifrələnmiş məlumat daşıyıcıları, rabitə vasitələri, foto və video avadanlıqlarının aşkar edildiyi bildirilib.
