Husilər Yəməndə gərginliyin artdığı bir vaxtda ölkənin Moha və Marib şəhərlərinə raket və pilotsuz uçuş aparatları (PUA) ilə yeni hücumlar həyata keçiriblər.
Xəbər Mərkəzi “Al Jazeera” telekanalına istinadən xəbər verir ki, hücumlar nəticəsində 4 nəfər ölüb, 8 nəfər yaralanıb.
Məlumata görə, bazar günü gecəsi Qırmızı dəniz sahilində yerləşən Moha şəhərinin ətrafına zərbələr endirilib. Hücumlardan biri şəhərin əsas yoluna ziyan vurub. Nəticədə 4 nəfər ölüb, 8 nəfər yaralanıb.
Bundan əvvəl, şənbə günü axşamı Husilər Marib şəhərinin yaşayış məhəllələrinə 6 ballistik raket və 4 PUA atıblar. Hücumlar nəticəsində yaşayış evlərinə və mülki infrastruktura ziyan dəyib, 4 nəfər yaralanıb.
Yəməndə son günlər qarşıdurmaların yenidən genişləndiyi bildirilir. Moha limanına da bir neçə gün ərzində çoxsaylı raket zərbələri endirilib və nəticədə limanın fəaliyyəti dayandırılıb.
Qeyd edək ki, Husilər İran tərəfindən dəstəklənən silahlı hərəkat kimi tanınır. Yəməndə beynəlxalq səviyyədə tanınan hökumət qüvvələri ilə Husilər arasında uzun müddətdir davam edən qarşıdurma son günlər yenidən intensivləşib.
