Azərbaycanda dövlət ümumi təhsil müəssisələrində vahid geyim formalarının tətbiqi ilə bağlı qaydaların icrasına maneçilik törədilməsi zəminində ictimai qaydanın kobud şəkildə pozulması halları qeydə alınıb.
Daxili İşlər Nazirliyinin (DİN) Mətbuat Xidmətindən bildirilib ki, Bakı şəhərində bir qrup şəxs məktəblərdə vahid geyim qaydalarının tətbiqi ilə əlaqədar təhsil işçiləri ilə münaqişə yaradıb, dövlət təhsil müəssisələrinə zərər vurub, ictimai qaydanı kobud şəkildə pozmağa, nəqliyyatın hərəkətinə və məktəblərin normal fəaliyyətinə mane olmağa cəhd edib.
Faktla bağlı Cinayət Məcəlləsinin 233-cü maddəsi ilə cinayət işi başlanılıb. İş üzrə 37 nəfər həbs edilib.
DİN-in məlumatına görə, görülən tədbirlərin əsas məqsədi qanunvericiliyin tələblərinin icrasını təmin etmək, ictimai asayişin pozulmasının və nəqliyyatın hərəkətinə maneçilik yaradılmasının qarşısını almaq, təhsil müəssisələrinin normal fəaliyyətini və şagirdlərin, müəllimlərin, eləcə də digər vətəndaşların təhlükəsizliyini qorumaqdır.
Nazirlik vətəndaşları qanunvericiliyin tələblərinə əməl etməyə, ictimai qaydanı pozmamağa, digər şəxslərin hüquq və mənafelərinə zərər vurmamağa, həmçinin polis əməkdaşlarının qanuni tələblərini yerinə yetirməyə çağırıb.
Bildirilib ki, ictimai asayişin və təhlükəsizliyin qorunması, təhsil müəssisələrinin normal fəaliyyətinin təmin edilməsi istiqamətində tədbirlər davam etdiriləcək.
