Həftəsonunadək Bakıda və Abşeron yarımadasında hava şəraitinin əsasən yağmursuz keçəcəyi gözlənilir.
Avqustun 20-si gündüzdən 21-i gündüzədək şimal-qərb küləyinin güclənəcəyi, havanın temperaturunun 29-33 dərəcə isti olacağı proqnozlaşdırılır.
Avqustun 22-23-də isə mülayim cənub-şərq küləyi üstünlük təşkil edəcək. Bu günlərdə havanın maksimal temperaturunun 30-35 dərəcə isti olacağı gözlənilir.
Azərbaycanın rayonlarında avqustun 20-si gündüz şimal və qərb rayonlarından başlayaraq 21-i gündüzədək hava şəraitinin qeyri-sabit keçəcəyi, fasilələrlə yağış yağacağı bildirilir. Ayrı-ayrı yerlərdə yağıntıların qısamüddətli leysan xarakterli və intensiv olacağı, şimşək çaxacağı və dolu düşəcəyi ehtimal edilir.
Avqustun 22-23-də bölgələrdə də əsasən yağmursuz hava şəraiti müşahidə olunacaq. Havanın maksimal temperaturu aran rayonlarında 33-38, dağlıq ərazilərdə 20-25 dərəcə isti olacaq.
Qeyd edilib ki, avqustun 19-dək ölkə ərazisində temperatur 17 gün normadan 0,4-5,2 dərəcə yüksək, 1 gün isə 0,3 dərəcə aşağı olub. Avqustun 9-da temperatur normadan 5,2 dərəcə yüksək qeydə alınıb və həmin gün havanın maksimal temperaturu 38,6 dərəcə təşkil edib.
