Rusiyanın Ukraynanın paytaxtı Kiyevə endirdiyi kütləvi ballistik raket zərbələri nəticəsində azı 9 nəfər həlak olub, 23 nəfər yaralanıb.
Ukrayna Dövlət Fövqəladə Hallar Xidmətinin məlumatına görə, yaralılar arasında uşaqlar da var. Hücum nəticəsində paytaxtın beş rayonunda yaşayış və qeyri-yaşayış binalarına ziyan dəyib, çoxsaylı yanğınlar baş verib.
Ən ağır itkilər Darnıtski rayonunda qeydə alınıb. Burada 7 nəfər ölüb, 14 nəfər yaralanıb. Rayon ərazisində inzibati və qeyri-yaşayış binalarında yanğınlar baş verib, avtomobillər yanıb, yaşayış evlərinə ziyan dəyib. Xilasedicilər raketin yaratdığı krateri də aşkar ediblər.
Şevçenkovski rayonunda qeyri-yaşayış binasında və kinostudiyanın ərazisində yanğın baş verib. Hücum zamanı təcili tibbi yardım avtomobilləri də zərər görüb.
Dneprovski rayonunda mağazaya, Peçerski rayonunda isə dörd fərdi yaşayış evinə və yardımçı tikililərə ziyan dəyib.
