Ermənistanda “Ararat” konyak-şərab-araq kombinatının əməkdaşları müəssisənin fəaliyyətinin bərpa olunması tələbi ilə etiraz aksiyası keçiriblər.
Etirazçılar bildiriblər ki, zavodun bağlanması nəticəsində 500-700 əməkdaş işsiz qalıb, bu isə ümumilikdə 1500-ə yaxın ailə üzvünə təsir göstərib.
İşçilərin sözlərinə görə, istehsalın dayandırılması isti hava şəraiti, xammal və spirt çənlərinin vəziyyəti nəzərə alınarsa, İrəvanın mərkəzində qəza riski yarada bilər.
Aksiya iştirakçıları hüquq-mühafizə orqanlarından müəssisənin fəaliyyətini bərpa etməyi və onların əmək hüquqlarını təmin etməyi tələb ediblər. Zavodun qapılarının iyulun 6-dan möhürləndiyi, əməkdaşların isə artıq səkkiz gündür məcburi işsiz qaldığı bildirilib.
Etirazçılar Abovyan İstintaq Şöbəsinə yürüş edərək tələbləri yerinə yetirilməyəcəyi təqdirdə İrəvan-Göyçə avtomobil yolunu bağlaya biləcəklərini bəyan ediblər.
