Avropa Komissiyası (AK) sentyabrın 18-də Avropa İttifaqının (Aİ) 90 milyard avro məbləğində kredit çərçivəsində silahların alınması üçün Ukraynaya 3,3 milyard avro köçürüb.
Bu barədə Avropa Komissiyası məlumat yayıb.
“Bu gün biz Ukrayna üçün kredit çərçivəsində pilotsuz uçuş aparatları (PUA) və raketlərin alınması üçün 3,3 milyard avro köçürürük. Avropa öz xalqının və ərazisinin müdafiəsi üçün zəruri olan dəstəyi verməyə davam edəcək”, – AK rəhbəri Ursula fon der Lyayen bildirib.
Bu, kredit çərçivəsində müdafiə sahəsi üzrə Ukraynaya edilən dördüncü ödənişdir. Hazırkı tranş nəzərə alınmaqla, 2026-cı ildə AK tərəfindən Ukraynanın müdafiə və digər ehtiyaclarına köçürülən vəsaitin ümumi həcmi 15 milyard avroya yaxınlaşır.
90 milyard avro məbləğində kredit 2026-2027-ci illərdə Ukraynaya büdcə dəstəyi üçün 30 milyard avro, müdafiə xərcləri üçün isə 60 milyard avro nəzərdə tutur.
AK qeyd edib ki, Ukraynaya hərbi potensialını qorumaq üçün qısa müddətdə və kifayət qədər həcmdə kritik əhəmiyyətli silahlar lazımdır. Aİ ehtiyatlardan istifadə etməklə, sifarişləri yenidən bölüşdürməklə və istehsalı artırmaqla tədarükləri sürətləndirməyi planlaşdırır.
Yeni tranş sentyabrın 11-də Ukraynanın hava hücumundan və raketdən müdafiəsinə, eləcə də digər müdafiə ehtiyaclarına 6,1 milyard avro ayrılmasının təsdiqlənməsindən sonra həyata keçirilib. Bu məbləğə, xüsusilə, “Patriot” sistemləri üçün PAC-3 raketləri daxildir.
AK, həmçinin mövcud “Freya” sistemi əsasında hava hücumundan və raketdən müdafiə üzrə Avropa sisteminin yaradılması üçün Aİ və Ukraynanın yeni birgə proqramının işə salınması məqsədilə SAFE alətinin qalan vəsaitlərindən istifadə etməyə hazır olduğunu bildirib.
Məlumata görə, 2022-ci ilin əvvəlindən Aİ və üzv dövlətləri dondurulmuş Rusiya aktivlərindən əldə edilən 3,8 milyard avro gəlir də daxil olmaqla, Ukraynaya ümumilikdə 224,5 milyard avro məbləğində dəstək verib.
