Yeni Dövlət Qulluğu Məcəlləsinin layihəsinə əsasən, “Dövlət qulluğu sertifikatı”nın qüvvədə olma müddəti azaldılır.
Layihə Milli Məclisin Hüquq siyasəti və dövlət quruculuğu komitəsinin iclasında müzakirə olunub.
Sənədə əsasən, sertifikatın qüvvədə olma müddəti 5 ildən 2 ilə endiriləcək.
Layihəyə görə, test imtahanları rübdə ən azı bir dəfə təşkil ediləcək. İmtahanda iştirak üçün ödənişin məbləğini müvafiq qurum müəyyən edəcək.
Müsabiqədə ilk dəfə iştirak edən şəxslər, Azərbaycanın ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar əlilliyi müəyyən edilmiş şəxslər və şəhid ailələrinin üzvləri test imtahanında iştirak üçün ödənişdən azad ediləcək. Bu ödəniş dövlət büdcəsi hesabına qarşılanacaq.
Qüvvədə olan sertifikat sahibi hər il beş vəzifə üzrə müsabiqənin müsahibə mərhələsində ödənişsiz iştirak üçün qeydiyyatdan keçə biləcək. Beşdən artıq vəzifə üzrə müsahibədə iştirak üçün isə ödəniş tələb olunacaq.
