“Moon Kids” uşaq bağçasının dələduzluqda ittiham olunan direktoru Havvaxanım Rüstəmovaya hökm oxunub.
Bakı Ağır Cinayətlər Məhkəməsində keçirilən prosesdə elan olunan hökmə əsasən, ona 5 il 6 ay müddətinə azadlıqdan məhrumetmə cəzası verilib. Rüstəmova 3 il müddətinə dövlət qulluğunda vəzifə tutmaq hüququndan məhrum edilib.
Məhkəmə onun cəzasını 3 il sınaq müddəti olmaqla şərti hesab edib.
Bundan əlavə, Rüstəmova barəsində seçilmiş ev dustaqlığı qətimkan tədbiri başqa yerə getməmək qətimkan tədbiri ilə əvəzlənib.
Məhkəmə iclasında dövlət ittihamçısı onun 7 il müddətinə azadlıqdan məhrum edilməsini istəyib.
Xatırladaq ki, Havvaxanım Rüstəmova 2024-cü ilin iyulunda saxlanılıb.
Baş Prokurorluğun məlumatına görə, “Moon Kids” MMC-də yol verilən qanunsuzluqlarla bağlı Nizami Rayon Prokurorluğunda cinayət işi başlanılıb.
Rüstəmova Cinayət Məcəlləsinin 178.2.2, 178.2.3, 178.2.4-cü (qulluq mövqeyindən istifadə etməklə təkrarən və xeyli miqdarda dələduzluq) və 308.1-ci (vəzifə səlahiyyətlərindən sui-istifadə) maddələri ilə təqsirləndirilən şəxs qismində cinayət məsuliyyətinə cəlb edilib və barəsində həbs qətimkan tədbiri seçilib.
Sonradan onun barəsində həbs qətimkan tədbiri ev dustaqlığı ilə əvəz olunub. “Moon Kids” uşaq bağçasının fəaliyyəti isə dayandırılıb.
