Bakıda və bölgələrdə yerləşən bir sıra su hövzələrində qanunvericiliyin tələblərinin pozulması halları aşkarlanıb.
Daxili İşlər Nazirliyinin Su Nəqliyyatında Polis İdarəsi Dövlət Su Ehtiyatları Agentliyi yanında Suların İstifadəsinə və Mühafizəsinə Dövlət Nəzarəti Xidmətindən daxil olan müraciətlər əsasında araşdırmalar aparıb.
Oxşar xəbərlər
Araşdırmalar zamanı Xəzər rayonunun Buzovna qəsəbəsində, Suraxanı rayonunun Bülbülə qəsəbəsində, Abşeron rayonunun Məmmədli kəndində yerləşən göllərdə, həmçinin Goranboy rayonunun Yuxarı Ağcakənd qəsəbəsi ərazisində Qaraçay çayının sahilində və Balakən rayonunda Dəliçay çayı ərazisində qanun pozuntuları müəyyən edilib.
Məlum olub ki, qeyd olunan su hövzələri tikinti-söküntü və məişət tullantıları, eləcə də bərk və qarışıq süxurlarla qanunsuz şəkildə doldurulub. Həmin ərazilərin akvatoriyasına torpaq və digər materiallar tökülüb, sahilboyu mühafizə zolağında torpaq-qazıntı işləri aparılıb.
Bundan başqa, su hövzələrində icazəsiz qazıntı işləri nəticəsində yerin relyefi dəyişdirilib və hidroloji rejimin pozulmasına səbəb olan hallar aşkarlanıb.
Aşkarlanan faktlarla bağlı Cinayət Məcəlləsinin müvafiq maddəsi ilə cinayət işləri başlanılıb. Hazırda faktların hüquqi qiymətləndirilməsi məqsədilə istintaq tədbirləri davam etdirilir.
