Bakının və bölgələrin bir sıra ərazilərində yerləşən su hövzələrində qanunvericiliyin tələblərinin pozulması hallarının qarşısı alınıb.
Daxili İşlər Nazirliyinin Su Nəqliyyatında Polis İdarəsi Dövlət Su Ehtiyatları Agentliyi yanında Suların İstifadəsinə və Mühafizəsinə Dövlət Nəzarəti Xidmətindən daxil olan müraciətlər əsasında yoxlamalar aparıb.
Araşdırmalar zamanı Xəzər rayonunun Buzovna qəsəbəsində, Suraxanı rayonunun Bülbülə qəsəbəsində, Abşeron rayonunun Məmmədli kəndində yerləşən göllərdə, həmçinin Goranboy rayonunun Yuxarı Ağcakənd qəsəbəsində Qaraçay çayının sahilində və Balakən rayonunda Dəliçay ərazisində qanun pozuntuları müəyyən edilib.
Məlum olub ki, bəzi ərazilər tikinti-söküntü və məişət tullantıları, eləcə də müxtəlif süxurlarla qanunsuz şəkildə doldurulub. Su hövzələrinin ərazisinə torpaq və digər materiallar tökülüb, sahilboyu mühafizə zolaqlarında qazıntı işləri aparılıb.
Bundan başqa, icazəsiz qazıntılar nəticəsində ərazinin relyefinin dəyişdirildiyi və su hövzələrinin hidroloji rejiminə mənfi təsir göstərildiyi müəyyən olunub.
Aşkarlanan faktlarla bağlı Cinayət Məcəlləsinin müvafiq maddəsi əsasında cinayət işləri başlanılıb. Hazırda hadisələrin hüquqi qiymətləndirilməsi üçün istintaq tədbirləri davam etdirilir.
