Azərbaycan Yerüstü Nəqliyyat Agentliyinin (AYNA) məlumatına görə, sentyabrın 15-dən Bakının marşrut xətlərində 2 530 avtobus fəaliyyət göstərəcək.
Bu, son illərin ən yüksək göstəricisidir. 2022-ci ildə paytaxtda 1 780 avtobus istismar olunurdusa, bu rəqəm 2023-cü ildə 2 011, 2024-cü ildə 2 180, 2025-ci ildə isə 2 340 olub.
Beləliklə, son 5 ildə marşrut xətlərində avtobusların sayı 750 ədəd və ya 42 faiz artıb.
AYNA-dan bildirilib ki, bu il 8 yeni ekspres marşrut təşkil edilib, 28 müntəzəm xətt gücləndirilib. Həmçinin 29 marşrut xəttində köhnə avtobuslar daha yeni və müasir nəqliyyat vasitələri ilə əvəzlənib.
Qeyd edilib ki, il ərzində dövlət və özəl müəssisələr tərəfindən 308 yeni avtobus gətirilib.
